Art Market Budapest 2015
Интернационално претставување| Проектен простор Прес ту Егзит (MK) | Art Market Budapest 2015 | 8 - 12 октомври, 2015
Проектниот простор Прес ту егзит има чест да го најави своето учество на 5-тото издание на Art Market Budapest, интернационален уметнички саем во Унгарија кој се случува во периодот од 8-12 октомври, 2015 година, во Културниот центар Millenaris во Будимпешта.
Саемот ќе понуди презентација на широк спектар на уметнички дела од околу 30 земји од светот, претставени од домашни и интернационални галерии и непрофитни организации. Истиот е концепиран како единствена уметничка композиција од највозбудливите изложбени простори во Европа, која освен што претставува изложувачи добредојдени од уметничките саеми со најстара традиција, акцентот го става и на присуството на младата генерација на галеристи и уметници. Со тоа саемот дефинира нов културен регион: Young Europe, каде можат да се најдат комбинирани влијанија од поранешните комунистички земји од Балтикот до Балканот, од извори на културна инспирација каква што е Турција, Израел, земјите од Централна Азија или прогресивната нова генерација на уметници од Западот.
НАОПАКУ-НЕ ТОЛКУ БЕЛА КОЦКА
Надворешни активности | Јане Чаловски и Христина Иваноска | изложба „Наопаку-не толку бела коцка“ | курирана од Аленка Грегорич и Сузана Милевска | Градска уметничка галерија, Љубљана | 24.09-22-10. 2015.
Во четврток на 24 Септември во 20ч. во Градската уметничка галерија во Љубљана ќе се отвори изложбата Наопаку – не толку бела коцка што е дел од долготрајниот и ко-кураторски истражувачки и интердисциплинарен проект инициран од Аленка Грегорич, уметничка директорка на Градската уметничка галерија во Љубљана (City Art Gallery Ljubljana), и Сузана Милевска, независна кураторка и теоретичарка на уметност од Македонија. Делата на уметниците од Македонија Јане Чаловски и Христина Иваноска (овогодишни претставници на Република Македонија на Венециското биенале кои на изложбата се претставуваат со проектот Музеј на модерна уметност на Oskar Hansen) и Лилјана Ѓузелова и Сашо Станојковиќ кои ќе го изложат својот прв колаборативен проект Инвентарна книга на прашања и одговори (објавен во дневниот весник Слободен печат на 31 јули оваа година) ќе бидат презентирани паралелно со делата на дваесетина други уметници како Азра Акшамија, Лучезар Бојаџијев, Власта Делимар, Андреас Фогараси, Флака Халити, Јусуф Хаџифејзовиќ, Сања Ивековиќ, ИРВИН (IRWIN), Далибор Мартинис, Иван Мудов, Тадеј Погачар, Илона Немет, Дан Пержовски, Лиа Пержовски, Славен Тољ и други различни дела и информации за слични активности во Просторот за истражување: АртЛикс, Раша Тодосијевиќ, Југословенска документа, итд.
Музеј на женски приказни
Надворешни активности | Христина Иваноска | истражувачки проект како дел од проектот „Културата во улога на територијален развој и социјална кохезија” | 15.09-30-11. 2015.
Музеј на женски приказни е ко-авторски проект на Искра Гешоска, Христина Иваноска, Виолета Качакова и Биљана Тануровска-Ќулавковски кој произлезе од идејата да се истражи, согледа и (ре)афирмира улогата на жената во општествено-политичкиот, социјалниот и семејниот контекст преку исчитување на културните значења, симболи, асоцијации, задскриени зад историските факти, од првата половина на 20-тиот век во Битола, Прилеп и Крушево со околијата на Пелагонискиот регион.